Расмий муносабат
Ижтимоий тармоқ орқали “Кассада тўлов қилаётган вақтда Сиздан чекдаги суммадан қарийб 70 минг сўм кўп пул ечиб олинса-ю, бу чекда мутлақо акс этмаса, буни қандай тушуниш керак?” мавзуида мурожаат қолдирилган.
Рақобатни ривожлантириш ва истеъмолчилар ҳуқуқларини ҳимоя қилиш қўмитаси мазкур мурожаат юзасидан қуйидагиларни маълум қилади.
Қўмита томонидан олиб борилган ўрганишларда Қорақалпоғистон Республикаси Элликқалъа тумани Қаватқалъа Фидрда шу куни кичик таъмирлаш ишлари олиб борилган ва электр таъминотида узилишлар бўлган. Бунинг натижасида мурожаатда келтирилган, мазкур ҳудудда фаолият юритаётган савдо шохобчасида музлатгичлар, касса ва ёритиш чироқларини генератордан фойдаланган ҳолда ишлатиб турилган. Шу сабабли янги келтирилган товарлардан баъзиларининг, шу жумладан истеъмолчи харид қилмоқчи бўлган яшил олма маҳсулотининг ҳам омбор ва назорат касса машинаси ўртасидаги интегрaцияси кечиккан. Бу ҳақда тушунтириш берилишига қарамай, истеъмолчи вақти тиғизлиги, ортиқча кута олмаслигини билдирган.
Шундан сўнг истеъмолчи розилиги билан тўлов электрон илова орқали онлайн шаклда жамиятнинг банкдан очилган “ERIZON” банк пластик картасига кўчирилган. Мазкур жараёнларда нархлар ўртасида тафовут юзага келган.
Ўрганишлар натижасида техник хато юзасидан келган камчиликлар бартараф этилган, яъни “ERIZON” МЧЖ томонидан истеъмолчига 445 минг сўмга яқин харид қилган озиқ-овқат маҳсулотлари учун QR-кодли чек тақдим этилган, олма маҳсулоти нархлари ўртасидаси тафовут ҳам қайтарилиши таъминланди.
Шу билан бир қаторда омбор ва касса ўртасидаги интеграция бўйича янги келтирилган товарлар шу куннинг ўзида кирим қилинган ва уларнинг савдоси амалга оширилиши йўлга қўйилган.
