Жорий йилнинг 7-9 октябрь кунлари Қўмита раиси ўринбосари Ф. Карабаев Брюссель шаҳрида (Бельгия) Европа Комиссиясининг Рақобат бўйича Бош директоратига ташрифни амалга оширди ҳамда монополияга қарши курашишни тартибга солиш ва рақамли платформаларни назорат қилиш бўйича Бош директор ўринбосари Линси Маккаллум хоним ва Рақобат сиёсати ва стратегия бошқармаси бошлиғи Инге Бернаертс хоним билан амалий учрашув ўтказди.
Учрашувда Қўмита вакили томонидан Давлатимиз Раҳбари ташаббуси билан Ўзбекистонда рақобатни янада ривожлантириш, иқтисодиётда давлат иштирокини қисқартириш ва барча бозор иштирокчиларга тенг шароитлар яратиш, илғор халқаро амалиётларга тўлиқ уйғунлаштирилган рақобат сиёсатининг ҳуқуқий базасини янада такомиллаштириш бўйича амалга оширилган таркибий ислоҳотлар ҳамда эришилган натижалар ҳақида маълумот берилди.
Шундан сўнг, янги “Рақобат тўғрисидаги” қонун ҳамда рақамли платформаларни монополияга қарши тартибга солишга доир янги низом талаблари, ундаги ёндашувлар тўғрисида маълумот берилди.
Ўз навбатида, Рақобат Бош Директорати вакиллари томонидан Европа Иттифоқида қабул қилинган ва 2024 йилда кучга кирган “Рақамли бозорлар тўғрисидаги” Қонунни (Digital Markets Act) амалга тадбиқ этиш жараёни тўғрисида ҳамда Европа Комиссияси томонидан рақамли платформаларга нисбатан қўзғатилган ишлар, глобал рақамли платформаларга нисбатан шаклланган позиция ва ушбу қонунга платформалар томонидан мувофиқлик (комплаенс) механизмларини ишлаб чиқиши тартиботлари ва жараёнлари ҳақида маълумот берилди.
Бундан ташқари, Қўмита вакили Европа Комиссияси томонидан ташкил этилган Европа Иттифоқининг рақобат қонунчилиги ва сиёсати амалиётлари мавзусига бағишланган Халқаро амалий семинарда иштирок этилди. Бунда, картелларни аниқлаш тартиблари ва самарали усуллари, иқтисодий концентрацияни монополияга қарши тартибга солиш, давлат ёрдамини рақобатга таъсирини баҳолаш ва тартибга солиш бўйича Европа Иттифоқининг амалиёти бўйича тақдимотлар ва муҳокамалар бўлиб ўтди.
Учрашувлар натижаларига кўра қуйидаги келишувларга эришилди:
- Қўмита мутахассисларнинг Европа Комиссиясининг Рақобат Бош Директоратида 3 ойлик амалиёт ўташини ташкил этиш;
- Қўмита билан Рақобат Бош Директорати ўртасида рақамли платформаларни монополияга қарши тартибга солиш бўйича ўзаро маслаҳатлашув механизми ишга тушириш ва Халқаро Рақобат Тармоғи доирасида унинг 5 та ишчи гуруҳлари (рақобат принципларини тарғиб қилиш, рақобат органлари самарадорлигини ошириш, картеллар билан курашиш, иқтисодий концентрацияни назорат қилиш ва устун мавқени суиистеъмол қилишни олдини олиш) фаолиятида Қўмитанинг иштирокини фаоллаштириш.
Шунингдек, College of Europe Университетининг (Бельгия) Глобал рақобат бўйича ҳуқуқ маркази президенти ҳамда жаҳоннинг етакчи юридик фирмаларидан бири Linklaters юридик фирмасининг Монополияга қарши кураш ва хорижий инвестициялар амалиётининг глобал раҳбари доктор Бернд Мейринг билан учрашув ўтказилди. Учрашув натижаларига кўра дастурларида рақобат сиёсати ва ҳуқуқи йўналишлари мавжуд бўлган Ўзбекистондаги олий ўқув муассасаларида талабалар учун махсус академик тренингларини ташкил этиш, Қўмитанинг мутахассислари салоҳиятини ошириш бўйича тренинглар ўтказиш ҳамда Қўмитанинг институционал салоҳиятини ошириш мақсадида техник кўмак лойиҳаларига Linklaters юридик фирмасининг экспертларини рақобат қонуничилигини такомиллаштириш бўйича маслаҳатчи сифатида жалб этиш бўйича келишувларга эришилди.
Бундан ташқари, Европа Иттифоқи ва Ўзбекистон ўртасидаги иқтисодий ҳамкорлик бўйича (EuroUz) ассоциациясининг Интеллектуал мулк ва рақобат масалалари қўмитаси аъзолари билан учрашув ўтказилди ва ушбу учрашувда Европа компанияларнинг Ўзбекистон бозорига киришида рақобат билан боғлиқ тизимли муаммолар ва уларнинг ечимлари муҳокама қилинди.
Учрашув натижаларига кўра, Ассоциация ва Қўмита ўртасида Англашув Меморандуми имзоланди. Ушбу Меморандумга мувофиқ Ассоциация Қўмитага Европа комиссияси билан ўзаро ҳамкорлик алоқаларини ривожлантиришга кўмак беради, Европа Иттифоқининг тадбиркорлик субъектлари Ўзбекистонда ўз фаолиятларини амалга оширишидаги барьерларни бартараф этишга ҳамда уларни Ўзбекистонга инвестиция оқимини оширишга кўмаклашиш бўйича доимий маслаҳат механизми жорий этилади.
Ушбу амалий ташриф Ўзбекистон Республикасининг Бельгия, Нидерландия ва Люксембургдаги элчихонаси ва шахсан Фавқулодда ва Мухтор Элчи Ғайрат Фозилов ҳамда Германиянинг Германиянинг Sparkassen Stiftung for International Cooperation ташкилотининг (Лия Граубергер хонимнинг) бевосита кўмагида амалга оширилди.
Ушбу амалий ташриф, Рақобатни ривожлантириш ва истеъмолчилар ҳуқуқларини ҳимоя қилиш қўмитаси ва Европа Комиссиясининг рақобат сиёсати соҳасида узоқ муддатли ва самарали ҳамкорлигига замин яратади.