Ижтимоий тармоқларда миллий ва оилавий қадриятларга зид жойлаштирилган рекламалар юзасидан тегишли таъсир чоралари кўрилди
Ижтимоий тармоқларда «Кийим-кечак дўкони ҳамда меҳмонхоналарнинг рекламаси одоб-ахлоқ меъёрларига мос келмайдиган тарзда жойланиб, миллий ва оилавий қадриятларга зид образ ва ибораларда берилгани…” жамоатчилик томонидан кўплаб муҳокамаларга сабаб бўлмоқда.
Хусусан, «aykous_sekret», «dom_penyuar», «shiray shop», «nargizem_shop» ва «arzon hostel» Instagram саҳифаларида жойлаштирилган реклама роликларининг мазмуни ва унда тасвирланган ҳолатлар ахлоқ ва маънавиятнинг умум қабул қилинган нормаларига зид эканлиги қайд этилган.
Юқоридагиларга кўра, Рақобат қўмитаси томонидан “aykous_sekret» кийим-кечак савдо дўконининг расмий юритувчиси “Ilyasova Aygerim Marataovna” ЯТТ ҳамда «dom_penyuar» кийим-кечак савдо дўконининг расмий юритувчиси «Abdullayeva Aynura Rauajovna»га нисбатан қонун бузилиши ҳолати юзасидан “Реклама тўғрисида”ги Қонун талабларини бузгани юзасидан белгиланган тартибда иш қўзғатилиб, якунлари бўйича молиявий жарималар қўлланилди.
Шунингдек, «shiray shop», «nargizem_shop» ва «arzon hostel» Instagram саҳифаларида жойлаштирилган реклама роликларининг мазмуни ва унда тасвирланган ҳолатлар ахлоқ ва маънавиятнинг умум қабул қилинган нормаларига зид эканлиги сабабли маъмурий баённома расмийлаштирилиб, тегишли тартибда суд органларига юборилди.
Маълумот учун. Ўзбекистон Республикаси “Реклама тўғрисида”ги Қонуннинг 16-моддасига асосан рекламада миллий ва оилавий анъаналарга, шунингдек ахлоқ ва маънавиятнинг умум қабул қилинган нормаларига зид бўлган шакллар, ибора ва образлардан фойдаланиш тақиқланади.
