Ikki tomonlama qarama-qarshi auksion orqali birja savdolarini o‘tkazish tartibi tasdiqlandi

Bugungi kunda Hukumat tomonidan birja savdolarida bozor konyunkturasini hisobga olgan holda, real narxni shakllantirishning zamonaviy mexanizmlarini joriy etish, sog‘lom raqobat va ishbilarmonlik muhitini yana-da yaxshilash, tovar-xom ashyo birjalari hamda birja ishtirokchilari faoliyatida qonun buzilishi holatlarining oldini olish mexanizmlarini takomillashtirishga qaratilgan islohotlar olib borilmoqda.
Shu munosabat bilan joriy yilning 11-aprelida O‘zbekiston Respublikasi Vazirlar Mahkamasining 220-sonli qarori bilan “Zamonaviy birja mexanizmlarini joriy etish orqali birja savdolarida narxlar o‘zgarishining oldini olishning qo‘shimcha chora-tadbirlari to‘g‘risida”gi qaror qabul qilingan.
Mazkur qaror bilan O‘zbekiston respublika tovar-xom ashyo birjasida ikki tomonlama qarama-qarshi auksion orqali birja savdolarini o‘tkazish tartibi to‘g‘risidagi nizom tasdiqlandi.
Nizomda O‘zbekiston respublika tovar-xom ashyo birjasida ikki tomonlama qarama-qarshi auksion orqali birja savdolarini o‘tkazish tartibi sxemasi tasdiqlangan.
Qo‘shimcha qulayliklar nimalardan iborat?
Qaror doirasida Vazirlar Mahkamasining 2020-yil 18-martdagi 170-sonli qaroriga ham tegishli o‘zgartirishlar kiritilgan. Ya’ni, yuqori likvidli yoki monopol turdagi mahsulotlar sotuvida:
Birja savdolarida sotilmay qolgan mahsulotlarning hajmlari takroran birja savdosiga qo‘yilishi;
sotuvchi tomonidan mazkur hajmlar bo‘yicha mahsulotning boshlang‘ich narxi qayta ko‘rib chiqilishi;
boshlang‘ich narxdan past narxda buyurtmalar qabul qilinishi;
savdolarni ikki tomonlama auksion tartibi orqali o‘tkazilishi bo‘yicha tovar-xom ashyo birjalariga murojaat qilishi mumkinligi to‘g‘risidagi normalar bilan takomillashtirildi.