2025 йил 22 октябрь куни Ўзбекистон Республикаси Ҳукумати ва Жаҳон банки ҳамкорлигида амалга оширилаётган “Институционал салоҳиятни ошириш” лойиҳаси доирасида Рақобатни ривожлантириш ва истеъмолчилар ҳуқуқларини ҳимоя қилиш қўмитасида “Картелларга қарши курашда жавобгарликни юмшатиш дастурлари (Leniency Programme)” мавзусидаги тақдимотнинг иккинчи босқичи ўтказилди. Тадбирни халқаро эксперт Лия Граубергер олиб борди.
Эксперт АҚШ, Германия, Япония, Европа Иттифоқи, Буюк Британия ва Корея Республикаси тажрибаларидаги илғор элементлар асосида Ўзбекистон шароитида Leniency дастурини жорий этиш бўйича амалий тавсиялар тақдим этди. Мазкур таклифлар миллий “Leniency дастури бўйича қўлланма”ни ишлаб чиқиш учун асос бўлиб хизмат қилади.
Тадбир картелларга қарши курашишнинг замонавий ва самарали механизмларини яратиш йўлидаги муҳим амалий қадам бўлди.
