Ушбу лизинг компаниясининг номини ўзигина инсонда умид учқунини пайдо қилади. Қаранг “Умид Савдо Файз Инвест”, яъни биз яхши умид билан бошлаган ишимизга файзли савдо хамроҳ бўлади!
Қорақалпоғистон Республикаси, Шуманай туманида истиқомат қилувчи фуқаро Кенжабой Атаниязов ҳам худди шундай яхши ниятлар билан 2018 йил 2 ноябрда “Умид Савдо Файз Инвест” МЧЖ (Тошкент ш., Шайхонтохур тумани, Эшон Бобохон кўчаси, 11-уй) билан “Кобальт” (2-позиция) русумли автомашинани харид қилиш тўғрисида шартнома тузди. Унга кўра, фуқаро Кенжабой Атаниязов лизингнинг бирламчи тўлови – 49 млн. 250 минг сўм тўлаган.
Шартнома шартига кўра, бирламчи тўлов тўлангандан сўнг 120 кун мобайнида машина ўз эгасига топширилиши керак эди. Бироқ, 120 кун ҳам ўтди, ундан кейин яна беҳисоб кунлар ўтди, бироқ машинадан дарак йўқ.
Тузилган шартноманинг 2.1.3. бандида истеъмолчи ўз маблағини шартнома тузилган кундан эътиборан 150 кун ўтгандан сўнг қайтариб олиши мумкин дейилгани сабабли, фуқаро К. Атаниязов 2019 йил 8 августда “Умид Савдо Файз Инвест” МЧЖ ни Нукус филиалига шартномани бекор қилиш ва тўланган пулни қайтариш тўғрисида ариза билан мурожаат қилган. Шартнома шартига кўра, пул аризачининг ҳисоб рақамига ариза берилган вақтдан эътиборан 40 кун мобайнида тушиши керак.
Мана энди хикоянинг энг “қизиқ” жойи бошланади. 40 кундан кейин хам, ундан кейинги кунларда ҳам жамият истеъмолчининг пулини қайтармади, унинг бир неча бор қилган мурожаатлар, шу жумладан лизинг компанияси рахбари Умид Паттоховга қилинган мурожаатлар жавобсиз қолди – мана сизга файзли савдога бўлган умид!
Кети кўринмаган қоғозбозликдан асаблари чарчаган К. Атаниязов 2019 йил 19 декабрда Монополияга қарши курашиш қўмитаси ҳузуридаги Истеъмолчилар ҳуқуқини ҳимоя қилиш агентлигига мурожаат қилди. Агентлик мутахассислари томонидан ушбу мурожаат жиддий ўрганиб чиқилди ва лизинг компаниясига шартнома шартларини бажариш яъни истеъмолчи томонидан тўланган пул маблағини қайтариш тўғрисида хат юборилди. Бугунги кунга келиб, истеъмолчининг қонуний ҳуқуқи тикланди, шартнома бўйича тўланган сумма тўлиқ қайтарилишига эришилди.
Ўз навбатида Ўзбекистон Республикаси Монополияга қарши курашиш қўмитаси ва Истеъмолчилар ҳуқуқини ҳимоя қилиш агентлиги яна бир бор эслатади:
“Ҳурматли истеъмолчилар! Шартнома ёки контрактга имзо қўйишингиздан аввал шартноманинг ҳар бир сатрини, айниқса кичик харфлар билан ёзилган сатрларини диққат билан ўқиб чиқинг. Агарда шартноманинг алоҳида олинган шартлари сизга тушунарсиз бўлса, у ҳолда албатта хуқуқшунос билан маслаҳатлашинг, бу билан сиз ҳуқуқингизни поймол бўлишини олдини олган бўласиз. Огоҳ бўлинг!”
Ўзбекистон Республикаси Монополияга қарши курашиш қўмитаси ва Истеъмолчилар ҳуқуқини химоя қилиш агентлиги сизнинг бузилган ҳуқуқингизни ҳимоя қилишга тайёр!
Монополияга қарши курашиш қўмитаси Матбуот хизмати
Манзил: Лабзак кўчаси, 3, Тошкент 100128
Тел: 71 207 47 00, 71 207 48 00
Сайт: antimon.gov,uz
Ижтимоий тармоқ: https://www.facebook.com/AntimonUz/