Бугунги кунда мамлакатимизда саноат, қишлоқ хўжалик маҳсулотлари ишлаб чиқариш, уларни қайта ишлаш борасида салмоқли ишлар олиб борилмоқда. Айниқса, тармоқларга замонавий техника ва технологияларнинг жалб этилаётгани ишлаб чиқарилаётган маҳсулотларнинг сифати, уларнинг рақобатбардошлигини таъминламоқда.
Ўзбекистон Республикаси Вазирлар Маҳкамаси томонидан 2021 йил 26 майдаги “2021 йилда ҳудудий ва республика тармоқлараро саноат ярмаркаларини ташкил этиш ва ўтказиш чора-тадбирлари тўғрисида”ги 324-сон қарорида 2022 йил учун буюртмалар портфелини шакллантириш бўйича республика тармоқлараро саноат ярмаркасини Тошкент шаҳрида ўтказилиши назарда тутилган.
Жорий йилнинг 14 декабр куни “Ўзэкспомарказ” Миллий кўргазмалар мажмуасида Республика тармоқлараро саноат ярмаркаси ўз ишини бошлади. Ярмарканинг дастури алоҳида мавзуларга бағишланган тадбирларга тўла. Жумладан, ярмарканинг биринчи кунига кончилик, металлургия, геология, кимё саноатига бағишланган тақдимотлар ўтказилса, иккинчи кунига енгил саноат, энергетика, нефть-газ, инновацион лойиҳалар ва уларни молиялаштириш, учинчи кунинга электротехника, машинасозлик, қурилиш материаллари, заргарлик, транспорт, тўртинчи кунига эса қишлоқ хўжалиги, озиқ-овқат, узумчилик, балиқчилик, соғлиқни сақлаш, фармацевтика истеъмол товарлари йўналишида тақдимотлар ва музокаралар ташкил этилиши назарда тутилган.
Шунингдек, кичик бизнес ва хусусий тадбиркорлик субъектлари билан республикадаги йирик саноат ва худудий корхоналар ўртасида тармоқлараро саноат кооперацияси алоқаларини янада кенгайтириш мақсадида ташкил этилган ярмаркада республикамизнинг барча саноат ва ҳудудий корхоналари, хўжалик бирлашмалари, яъни 3 185 та саноат ва ҳудудий корхоналар қатнашмоқда ҳамда тақдим этилган маҳсулотлар ассортименти 5 169 та товар позициясини ташкил қилмоқда.
Ярмарканинг ўзига хос хусусияти нафақат маҳаллий корхоналар ўртасида кооперация алоқаларини йўлга қўйиш, балки мамлакатимизда харидоргир импорт ўрнини босувчи маҳсулотлар ишлаб чиқаришни кенгайтиришга қаратилган инвестиция лойиҳалари сонини кўпайтиришни рағбатлантиришга алоҳида эътибор қаратилмоқда.
Тадбирга тайёргарлик кўриш босқичида, Ўзбекистонда фаолият кўрсатаётган ишлаб чиқариш объектларининг импорт таркиби чуқур таҳлил қилинди. Таҳлил натижалари асосида мамлакатда маҳаллийлаштирилиши керак бўлган товар позициялари белгиланди. Ташкилотчилар томонидан аниқ техник-иқтисодий ҳисоб-китоблар асосида инвестициявий лойиҳалар ишлаб чиқилди ва улар тадбир давомида иштирокчиларга тақдим этилади.
Ярмарка юксак савияда ташкил этилиб, тадбирнинг бой бизнес дастури, самарадорликни таъминлаш, маҳаллий тадбиркорлар ва ишлаб чиқарувчиларни қўшма лойиҳаларни амалга оширишга жалб этиш, саноат кооперациясини ташкил этиш ва ички бозорда юқори талабга эга бўлган маҳсулотларни маҳаллийлаштиришни назарда тутади. Ярмаркада асосий эътибор маҳаллий ишлаб чиқарувчи корхоналарни қўллаб-қуваатлаш, саноатда кооперация алоқаларини ривожлантириш ҳамда маҳаллий ишлаб чиқарувчи корхоналар шу жумладан, кичик бизнес ва хусусий тадбиркорлик субьектлари томонидан ишлаб чиқарилаётган маҳсулот турларини ўрганиб чиқиш, келгусида саноат кооперациясини йўлга қўйиш ва иш кўламини кенгайтириш учун буюртмалар портфелини (шартнома ва меморандумлар) шакллантиришга йўналтирилади.
Республика тармоқлараро саноат ярмаркаси жорий йилнинг 18 декабрига қадар давом этади. Ярмарка саноат ривожига ва мамлакат иқтисодиётининг турли тармоқларига илғор ишлаб чиқариш технологияларини жадал жорий этишга туртки бериши ҳамда келажакда Ўзбекистон саноат доиралари учун доимий платформага айланиши кутилмоқда.