Қўмита томонидан хўжалик юритувчи субъектларнинг устав фондидаги (устав капиталидаги) акцияларни (улушларни) олиш ҳамда хўжалик юритувчи субъектларни қўшиб юбориш ва қўшиб олишга оид битимларга олдиндан розилик бериш бўйича давлат хизматларини кўрсатиш юзасидан Маъмурий регламентлар ишлаб чиқилди ва Вазирлар Маҳкамасига тасдиқлаш учун киритилди.
Уларнинг зарурати ва амалий аҳамияти нимада?
Биринчидан, давлат органлари томонидан тадбиркорлик субъектлари ва аҳолига кўрсатиладиган интерактив давлат хизматлари кўрсатиш жараёнини барча жабхаларда фаол амалга ошириш.
Шу муносабат билан, иқтисодий концентрация бўйича битимларга монополияга қарши органнинг олдиндан розилигини олиш учун ариза беришнинг янги тартибини жорий этиш таклиф қилинди. Шундай қилиб, иқтисодий концентрация бўйича битимларни амалга ошириш учун монополияга қарши органнинг олдиндан розилигини олиш учун аризалар Давлат хизматлари марказлари орқали, шунингдек Ягона инерактив давлат хизматлари портали (my.gov.uz) орқали берилиши мумкин.
Иккинчидан, монополияга қарши органнинг олдиндан розилигини олишда рухсат бериш тартиб-таомилларининг шаффофлиги таъминланади. Шунингдек, хизматларни тақдим этишнинг ҳар бир босқичида аризаларни кўриб чиқиш жараёнини кузатиб бориш тартиби жорий этилади.
Учинчидан, бундай мурожаатларни кўриб чиқиш муддати ўн кундан ошмаслиги лозимлигини ҳисобга олиб, идоралараро ҳамкорлик орқали амалга ошириладиган янги тартиб монополияга қарши орган томонидан хўжалик юритувчи субъектларнинг устав фондидаги (устав капиталидаги) акцияларни (улушларни) олиш ҳамда хўжалик юритувчи субъектларни қўшиб юбориш ва қўшиб олиш бўйича келиб тушадиган мурожаатларни кўриб чиқиш самарадорлигини ва тезкорлигини оширади.
Мазкур Регламентлар тасдиқлангандан кейин Монополияга қарши курашиш қўмитаси томонидан ушбу Регламентларнинг мазмун моҳиятива амалий қўлланилишини тушунтириш юзасидан қатор семинарлар ўтказилади.