Жорий йил давомида бозорда цементга бўлган эҳтиёж ортиб бормоқда. Жумладан Феврал ойидан бошлаб цемент нархи 619-625 сўм/кг гача кўтарилди.
Covid-19 пандемияси сабабли юртимизда эълон қилинган карантинда маҳсулот нархи 512-523 сўм/кг гача арзонлашди.
Карантин чекловлари қисман олингандан сўнг эса, цемент нархи яна кўтарила бошлади, бунга цемент импортининг пасайиши ҳам сабаб бўлди.
Шубҳасиз Covid-19 пандемияси кўп соҳалар каби цемент импортига ҳам ўз таъсирини кўрсатди. Буни жорий йилда мамалакатимизга хориждан кириб келаётган цемент ҳажмидан ҳам билиб олса бўлади. Йил бошидан бери 813 минг тонна ёки ўртача бир ой давомида 135,5 минг тонна. Зеро ўтган йили ҳудди шу давр оралиғида импорт кўрсатгичи 1 838 минг тонна ёки бир ойда 306,3 минг тоннани ташкил этган эди.
Цемент нархини барқарорлаштириш ҳамда импортини соддалаштириш мақсадида Қўмита томонидан ўрганишлар олиб борилди. Ўрганишлар давомида бир нечта маҳсулот импорти билан шуғулланувчи йирик корхоналар билан музокаралар ўтказилди, шунингдек импорт жараёнлари ўрганилди. Шундан сўнг, Монополияга қарши курашиш қўмитаси томонидан Вазирлар Маҳкамасига тегишли таклифлар киритилди.
Ўз навбатида Вазирлар Маҳкамаси жорий йилнинг 2 июл санасида Қўмитага цемент импортини соддалаштириш бўйича тегишли ҳужжат лойиҳаси ишлаб чиқиш бўйича топшириқ берди, бу ҳақда ижтимоий тармоқлардаги расмий саҳифаларимизда хабар берган эдик. Ушбу хабардан сўнг бозорда цемент нархининг бир хафталик нарх пасайиши кузатилди. 777 дан 752 сўм/кг гача.
23 июл санасида Вазирлар Маҳкамаси Қарорининг чиқиши эса, нархларни 875 дан 784 сўм/кг гача тушишига сабаб бўлди.
Амалда мазкур Қарор цемент импортининг ҳафтасига 70-92 минг тоннага ортишига, нархни эса 712 сўм/кг га тушишига сабаб бўлди.
Жумладан, сўнгги 4 кун давомида цемент нархи қуйидаги кўринишда пасайиши кузатилди: 24 августда – 733 сўм/кг, 25 августда – 722,7 сўм/кг, 26 августда – 705,9 сўм/кг; 27 августда – 684,2 сўм/кг.
Монополияга қарши курашиш қўмитаси Матбуот хизмати