“Uzbekistan Airports” АЖ томонидан иш берувчининг фуқаролик жавобгарлигини, қутқарув ходимларининг ҳаёти ва соғлигини, хавфли объектларни, машина ва механизмларни ҳамда аэропортлар фаолиятига боғлиқ бўлган бошқа объектларни суғурталаш бўйича танлов савдолари ўтказиш жараёнида Ўзбекистон Республикаси “Рақобат тўғрисида”ги Қонунининг талаблари бузилиши аниқланди.
Хусусан, компания томонидан жойлаштирилган эълонда давлат улуши
50 фоиздан юқори бўлган суғурта компаниялари иштирок этиши мумкинлиги тўғрисидаги талаб киритилган эди, бунинг оқибатида юқоридаги шартга мос келмаган бошқа компанияларнинг танловда иштирок этиш имконияти чекланишига олиб келган.
Ўзбекистон Республикаси “Рақобат тўғрисида”ги Қонунининг 14-моддасига мувофиқ савдоларнинг битта ёки бир нечта иштирокчисига савдоларда қатнашиш учун имтиёзли шарт-шароитлар яратиб бериш тақиқланиши белгиланган.
Юқоридагиларга мувофиқ, Қўмита томонидан “Uzbekistan Airports” АЖга қонун бузилиш ҳолатини бартараф этиш бўйича кўрсатма берилган.
“Uzbekistan Airports” АЖ томонидан танловда давлат улуши 50 фоиздан юқори бўлган суғурта компанияларининг иштирок этиши мумкинлиги тўғрисидаги рақобатга зид талаби бартараф этилиб, суғурта компаниясини танлаш учун қайтадан эълон берилган. Натижада барча суғурта компанияларига танлов савдосида иштирок этишида тенг шароит яратиб берилган.
Монополияга қарши курашиш қўмитаси Матбуот-хизмати